ಉಮಾಸಹಸ್ರಮ್ - ಸಂಪೂರ್ಣ ಸಂಸ್ಕೃತ ಶ್ಲೋಕಗಳು

ಉಮಾಸಹಸ್ರಮ್

ಗುರುಧ್ಯಾನಮ್

ಹಂಸಾಭ್ಯಾಂ ಪರಿವೃತ್ತಪತ್ರಕಮಲೈರ್ದಿವೈರ್ಜಗತ್ಕಾರಣೈ-

ರ್ವಿಶ್ವೋತ್ಕೀರ್ಣಮನೇಕದೇಹನಿಲಯೈಃ ಸ್ವಚ್ಛಂದಮಾತ್ಮೇಚ್ಛಯಾ

ತದ್ಯೋತಂ ಪದಸಂಭವಂ ತು ಚರಣಂ ದೀಪಾಂಕುರಗ್ರಹಿಣಮ್

ಪ್ರತ್ಯಕ್ಷಾಕ್ಷರವಿಗ್ರಹಂ ಗುರುಪದಂ ಧ್ಯಾಯೇದ್ವಿಭುಂ ಶಾಶ್ವತಮ್ ||

-     ಗುರುಗೀತದಿಂದ

ಪ್ರಥಮ ಶತಕ

ಪುಷ್ಪಗುಚ್ಛ (ಸ್ತಬಕ) - 1

ವ್ಯೋಮಶರೀರಾ, ಸ್ತ್ರೀರೂಪಾ ಚ

ಛಂದಸ್ಸು – ಆರ್ಯಾವೃತ್ತಂ

ಅಖಿಲಜಗನ್ಮಾತೋಮಾ ತಮಸಾ ತಾಪೇನ ಚಾಕುಲಾನಸ್ಮಾನ್

ಅನುಗೃಹ್ಣಾತ್ವನುಕಂಪಾಸುಧಾರ್ದ್ರಯಾ ಹಸಿತಚಂದ್ರಿಕಯಾ ||1||

ನಿಖಿಲೇಷು ಪ್ರವಹಂತೀಂ ನಿರುಪಾಧಿವಿಮರ್ಶಯೋಗದೃಶ್ಯೋರ್ಮಿಂ

ಅಜರಾಮಜಾಮಮೇಯಾಂ ಕಾಮಪಿ ವಂದೇ ಮಹಾಶಕ್ತಿಂ || 2 ||

ಸಾ ತತ್ತ್ವತಃ ಸಮಂತಾತ್ಸತ್ಯಸ್ಯ ವಿಭೋಸ್ತತಾ ತಪಶ್ಯಕ್ತಿಃ

ಲೀಲಾಮಹಿಲಾವಪುಷಾ ಹೈಮವತೀ ತನುಷು ಕುಂಡಲಿನೀ ||3||

ಪರಮಃ ಪುರುಷೋ ನಾಭಿರ್ಲೋಕಾನಾಂ ಸತ್ಯ ಉಚ್ಯತೇ ಲೋಕಃ

ಪರಿತಸ್ತತಃ ಸರಂತೀ ಸೂಕ್ಷ್ಮಾ ಶಕ್ತಿಸ್ತಪೋ ಲೋಕಃ ||4||

ಅಂತರ್ಗೂಢಾರ್ಥಾನಾಂ ಪುರುಷಾಗ್ನೇರ್ಧೂಮಕಲ್ಪ ಉದ್ಗಾರಃ

ಶಕ್ತಿಜ್ವಾಲಾಃ ಪರಿತಃ ಪ್ರಾಂತೇಷ್ವಭವಜ್ಜನೋ ಲೋಕಃ ||5||

ಅತಿಸೂಕ್ಷ್ಮಧೂಮಕಲ್ಪಂ ಲೋಕಂ ತತಮಾಯಯಾsನ್ಯಯಾ ನಾಕಂ

ಏತಂ ತತೋsಪಿ ಸೂಕ್ಷ್ಮಾ ವ್ಯಾಪ್ತಾsನ್ತರತಃ ಪರಾ ಶಕ್ತಿಃ ||6||

ಧೂಮಾಂತರೂಷ್ಮಕಲ್ಪಾ ಶುದ್ಧಜ್ವಾಲೋಪಮಾ ಚ ಯಾ ಶಕ್ತಿಃ

ತಾಂ ದಿವಮಾಹುಃ ಕೇಚನ ಪರಮಂ ವ್ಯೋಮಪಾರೇ ಪ್ರಾಹುಃ ||7||

ಉದ್ಗೀರ್ಣಧೂಮಕಲ್ಪೋ ಯೋsಯಮಪಾರೋ ಮಹಾಂಜನೋ ಲೋಕಃ

ವ್ಯೋಮಾಂತರಿಕ್ಷಗಗನಪ್ರಭೃತಿಭಿರಭಿದಾಭಿರಾಹುಸ್ತಂ ||8||

ಪ್ರಾಂತೇಷು ಕೋsಪಿ ಶಕ್ತೇಃ ಪೃಥಗಾತ್ಮಾ ವಿಯದುಪಾಧಿಸಂಗೇನ

ಪರಮಾತ್ಮನೋ ವಿಭಕ್ತಃ ಸ್ವಯಮಭಿಮಂತಾ ವಿನಿಷ್ಪೇದೇ ||9||

ದಕ್ಷಃ ಪರೋಕ್ಷಮುದಿತಃ ಪಂಥಾ ಏಷ ತ್ವಿಷಾಂ ಜನೋ ಲೋಕಃ

ತದ್ಗರ್ಭೇ ಲಬ್ದಾತ್ಮಾ ಕಥಿತಾ ದಾಕ್ಷಾಯಣೀ ಶಕ್ತಿಃ ||10||

ಸತ್ಯಾಃ ಪ್ರಾಗಪಿ ಶಕ್ತೇಃ ಪ್ರಾದುರ್ಭಾವಃ ಸ ಕೀರ್ತ್ಯತೇ ಪ್ರಥಮಃ

ಈಶಾಭಿಮಾನಮಯ್ಯಾಃ ಪೃಥಗಭಿಮಾನಿತ್ವನಿಷ್ಪತ್ತ್ಯಾ ||11||

ಆಕಾಶಸ್ಯ ಸುತೈವಂ ಲಕ್ಷಣಯಾ ವಸ್ತುತಃ ಪ್ರಸೂಃ ಶಕ್ತಿಃ

ಅದಿತೇರ್ದಕ್ಷೋ ದಕ್ಷಾದದಿತಿರಿತಿ ಶ್ರುತಿರಬಾಧೈವಂ ||12||

ಜಗತಾಂ ಮಾತಾಪಿತರೌ ಸತೀಭವೌ ಕೇsಪಿ ಪಂಡಿತಾಃ ಪ್ರಾಹುಃ

ಅದಿತಿಪ್ರಜಾಪತೀ ತಾವಪರೇಷಾಂ ಭಾಷಯಾ ವಿದುಷಾಂ ||13||

ದಿವ್ಯಪುಮಾಕೃತಿಮೀಶೇ ಬಿಭ್ರತಿ ಲೀಲಾರ್ಥಮಸ್ಯ ರಮಣಾಯಾ

ದಿವ್ಯವನಿತಾಕೃತಿಂ ಸಾ ಬಭಾರ ಮಾತಾ ಚ ಭುವನಾನಾಂ ||14||

ಭಾಸುರಹೇಮಾಭರಣಾಂ ಬಹುಶೋಭಾಮೀಶ್ವರಪ್ರಮೋದಕಲಾಂ

ಮೂರ್ತಿಂ ಪಾವನಕೀರ್ತಿಂ ತಾಂ ಹೈಮವತೀಮುಮಾಮಾಹುಃ ||15||

ತಸ್ಯ ಪ್ರಥಮಃ ಸಾಕ್ಷೀ ಭುವನಜುಷಾಂ ನಯನಶಾಲಿನಾಂ ಮಧ್ಯೇ

ವಪುಷಃ ಕೀಲಾದಿಸದೃಶೋ ನಿರುಪಮಪುಣ್ಯೋ ನಿಲಿಂಪಪತಿಃ ||16||

ಪಲ್ಲವಮೃದು ವೇದಿಗತಜ್ವಲಪವಿತ್ರಂ ಮಹಾರ್ಘಮಣಿಕಾಂತಂ

ನವಚಂದ್ರಖಂಡಸೌಮ್ಯಂ ಶಿವಸದೃಶಸ್ತತ್ಸ್ಮರಾಮಿ ವಪುಃ ||17||

ಕೇಚನ ಗೌರೀಂ ದೇವೀಂ ಶೀತಾದ್ರೇರ್ದೇವತಾತ್ಮನೋ ಜಾತಾಂ

ಕಥಯಂತಿ ಸ್ತ್ರಿಯಮುತ್ತಮಲಾವಣ್ಯಾಸ್ವಾದಿತೋ ಗಣ್ಯಾಂ ||18||

ಸತ್ಯೈವ ಭವತು ಸೇಯಂ ಕಥಾ ತಥಾsಪಿ ಪ್ರಭಾಷಿತಾಂ ಭಕ್ತೈಃ

ತಾಂ ಮೂರ್ತಿಮಾದಿಸದೃಶೋ ಜಾನೀಯಾತ್ಕಮಪಿ ತೇಜೋಂಶಂ ||19||

ಮನ್ಯಂತೇ ಕೇsಪಿ ಘನಂ ಪರ್ವತಮುಕ್ತಂ ನಿಗೂಢಯಾ ವಾಚಾ

ಪ್ರಾದುರ್ಭವತಿ ಗಭೀರಧ್ವನಿರವಿಷಹ್ಯಾ ಯತಃ ಶಕ್ತಿಃ ||20||

ಆಕಾಶೋ ಗೋಲೇಭ್ಯೋ ಯದ್ವಿತರತಿ ನಿಜರಜಶ್ಚಯಾದನ್ನಂ

ನೇಶಾಯ ಕೀರ್ತ್ಯತೇ ಸಾ ಸಂಸಾರೇ ದಕ್ಷಯಾಗಕಥಾ ||21||

ವ್ಯಾಪ್ತಾsಪಿ ಯನ್ನಿಗೂಢಾ ಬಹಿರೀಕ್ಷಕಬುಧ್ಯಪೇಕ್ಷಯಾ ನಷ್ಟಾ

ಶಕ್ತಿರ್ಯಾಗೇ ತಸ್ಮಿನ್ನವಸಾನಂ ತದುದಿತಂ ಸತ್ಯಾಃ ||22||

ಪರ್ವತನಾಮ್ನೋ ವೈದಿಕಭಾಷಾಯಾಂ ಯದಿಯಮತಿಬಲಾ ಶಕ್ತಿಃ

ಘನತೋ ಭವತಿ ವ್ಯಕ್ತಾ ತದಭಿಹತಂ ಪಾರ್ವತೀಜನನಂ ||23||

ತೇಜೋಂಶತಃ ಶಿವಾವಿಹ ಹಿಮಾಚಲೇsನುಗ್ರಹಾಯ ಭೂಮಿಜುಷಾಂ

ದತ್ತೋ ಯತ್ಸಾನ್ನಿಧ್ಯಂ ಲೀಲಾಚಾರಿತ್ರಮನ್ಯದಿದಂ ||24||

ಏತಾಸಾಮರ್ಯಾಣಾಂ ಜಾನಂತಃ ಶಾಸ್ತ್ರಸಮ್ಮತಂ ಭಾವಂ

ಜಾನೀಯುರ್ಭವಮಹಿಷೀಂ ಭುವನಾನಾಮಂಬಿಕಾಂ ದೇವೀಂ ||25||

ಪುಷ್ಪಗುಚ್ಛ (ಸ್ತಬಕ) - 2

ಸರ್ಗಾದಿವರ್ಣನಂ

ಛಂದಸ್ಸು- ಪಂಚಚಾಮರವೃತ್ತಂ

ಸಹಾದರೇಣ ಯೋ ವಲಕ್ಷಪಾರಿಜಾತಮಾಲಯಾ

ಗಲಸ್ಥಲೀವಿಭೂಷಯಾ ಧ್ವನಿಂ ವಿನೈವ ಭಾಷತೇ |

ಮಹೇಶಪುಣ್ಯಯೋಷಿತೋ ಮನೋಜ್ಞಹಾಸ ಏಷ ಮೇ

ವಿಭೂತಯೇ ಪ್ರಕಲ್ಪತಾಂ ವಿಧೂತಯೇ ಚ ಪಾಪ್ಮನಾಂ ||1||

ನಿರಂತರಶ್ರಿತೇ ಸದಾ ಕೃಪಾರಸಪ್ರವಾಹಿನೀ

ವಿಲಾಸಿನೀತನುರ್ವಿಭೋಃ ಪುಮಾಕೃತೇರ್ವಿಮೋಹಿನೀ |

ಸುಧಾತರಂಗಕಲ್ಪಹಾಸಭಾಸುರಾನನಾ ಶಿವಾ

ಪದಾಬ್ಜಲಂಬಿನೋ ಧುನೋತು ಪಾಪ್ಮನಃ ಫಲಂ ಮಮ ||2||

ಕರೋತಿ ಯಾ ಬಿಭರ್ತಿ ಯಾ ನಿಹಂತಿ ಯಾ ಜಗತ್ತ್ರಯಂ

ಸಮಂತತೋ ವಿಭಾತಿ ಯಾ ನ ದೃಶ್ಯತೇ ಕ್ವಚಿಚ್ಚ ಯಾ |

ಅತೀವ ಗುಪ್ತರೂಪಿಣೀ ಗುರೂಪದೇಶಮಂತರಾ

ನ ಶಕ್ಯತೇ ಬುಧೈಶ್ಚ ಬೋದ್ಧುಮಂಧಕಾರಿಸುಂದರೀ ||3||

ಮಹಾಂಧಕಾರಬಂಧುರಸ್ಯ ಭೂತಸಂಚಯಸ್ಯ ಯಾ

ವಿನಿದ್ರಿತಸ್ಯ ಸರ್ವಬೀಜಧಾಮ್ನಿ ಮೌನಮುದ್ರಿತೇ |

ಸಮಂತತೋ ವಿಜೃಂಭಣಾಯ ಭಾಸನಾಯ ಚಾಭವನ್

ಮಹದ್ವಿಧಾಯ ಚೇಷ್ಟಿತಂ ಮಮೇಯಮಿಷ್ಟದೇವತಾ ||4||

ಮಹೇಶಗರ್ಭತಃ ಸಮಸ್ತಭೂತಬೀಜಕೋಶತಃ

ಕಿರಂತ್ಯಶೇಷವಿಶ್ವಮಪ್ಯಪಾರದಿವ್ಯವೈಭವಾ |

ವಿಚಿತ್ರಚೇಷ್ಟಯಾssದ್ಯಯಾ ವಿಧೂತನಾಥನಿದ್ರಯಾ

ಜಗನ್ನುತಾ ಜಯತ್ಯಸಾವನಾದಿಶಕ್ತಿರದ್ಭುತಾ ||5||

ಭವಂ ಭಣಂತಿ ತಾಂತ್ರಿಕಾಸ್ತ್ವದಾಶ್ರಯಂ ತಮವ್ಯಯಂ

ಸಮಾಮನಂತಿ ವೈದಿಕಾಃ ಸದರ್ಚಿತೇ ಸದಾಹ್ವಯಂ |

ನ ಕಶ್ಚಿದರ್ಥಭೇದ ಏತದಾಖ್ಯಯೋರ್ಧ್ವಯೋರ್ಭವೇ-

ದ್ಭಿದೇಯಮಾದಿಮಂ ಪದಂ ಪುಮಾನ್ಪರಂ ನಪುಂಸಕಂ ||6||

ಸ ಚೇದ್ಭವೋsಭಿಧಾನತೋ ಭವಾನ್ಯಸಿ ತ್ವಮವ್ಯಯೇ

ಸಮೀರ್ಯತೇ ಸ ಸದ್ಯದಿ ತ್ವಮಂಬ ಭಣ್ಯಸೇ ಸತೀ |

ನ ತೇsಸ್ತಿ ಭಾವತಾ ನ ಶಕ್ತಿರೂಪಿಣೀ ಹಿ ವಿದ್ಯಸೇ

ನ ವೇದ್ಮಿ ಕಾಲಿಕೇ ಕಥಂ ಸತೋsಸತಶ್ಚ ಭಿದ್ಯಸೇ ||7||

ಜಗದ್ವಿಧಾನಕಾರ್ಯತಃ ಪುರಾ ಸುರಾಸುರಸ್ತುತೇ

ತ್ವಮಂಬ ಜೀವಿತಂ ಭವಸ್ಯಭಾವಮೂಲವಾದಿನಾಂ |

ವಿಕಲ್ಪವರ್ಜಿತಾ ಮತಿಃ ಪ್ರಬೋಧಮೂಲವಾದಿನಾಂ

ರಸೋsನಪೇಕ್ಷ ಉತ್ತಮಃ ಪ್ರಮೋದಮೂಲವಾದೊನಾಂ ||8||

ಭವತ್ಯಸಾವತೋ ಭವಾನ್ಯನಾದಿರಂತವರ್ಜಿತಾ

ಜಗಂತಿ ಮಾತಿ ನಿತ್ಯಮೋರಸೌ ತದಭ್ಯುಧಾಯ್ಯುಮಾ |

ರಸಾತ್ಮಿಕೋಶ್ಯತೇsಖಿಲೈರಸೌ ತತಃ ಶಿವೋಚ್ಯುತೇ

ಪರೈವಮೀಶಿತುಶ್ಚಿತಿಸ್ತ್ರಿಧಾ ಬುಧೈರುದೀರ್ಯತೇ ||9||

ಚಿತಿಃ ಪರೈವ ಕಾಮನಾ ರಸೇನ ಕೇನಚಿದ್ಯುತಾ

ಚಿತಿಃ ಪರೈವ ಸರ್ವದಾsಪ್ಯನಸ್ತ್ಯಜಸ್ಯ ತು ಕ್ರಿಯಾ |

ಚಿತಿಃ ಪರೈವ ಗೋಚರಾವಭಾಸಿಕಾ ಮತಿಃ ಸ್ಮೃತಾ

ತ್ರಿತೈವಮನ್ಯಥಾ ಚಿತೇಶ್ಚಿರಂತನೈರುದೀರ್ಯತೇ ||10||

ಚಿಕೀರ್ಷತಿ ಪ್ರಭೌ ಜ್ವಲತ್ತ್ವದೀಯಕೀಲಸಂತರ್ತೇ -

ವಿಕೀರ್ಣಧೂಮಜಾಲಮೇತದಂಬರಸ್ಥಲಂ ತತಂ |

ವಿಸೃಷ್ಟಿತಃ ಪುರಾsಸಿ ಯಾ ಶಿವಪ್ರಭುತ್ವರೂಪಿಣೀ

ಪೃಥಕ್ಪ್ರಭುಶ್ಚ ಲಕ್ಷಿತಾsಸಿ ಸಾ ಸವಿತ್ರಿ ಪುಷ್ಕರೇ ||11||

ಪುನರ್ವಿಪಾಕತೋ ಘನೀಭವದ್ಭಿರಕ್ಷಿಗೋಚರೈ –

ಸ್ತತಸ್ತತಃ ಸಮುಜ್ಜ್ವಲೈಃ ಖಸೂಕ್ಷ್ಮರೇಣುಗೋಲಕೈಃ |

ಅಜಾಂಡವೃಕ್ಷಕೋಟಿಕಂದಬೃಂದವದ್ವ್ಯಧಾಃ ಪುರಾ

ಮಹೇಶದೃಷ್ಟಿಮಯ್ಯುಮೇsಮ್ಬ ಮಂಡಲಾನಿ ಭಾಸ್ವತಾಂ ||12||

ತಪೋಗ್ನಿಧೂಮಜಾಲಕೇ ಭವಂತಿ ತೈಜಸಾಣವೋ

ಭವಂತಿ ಜೀವನಾಣವೋ ಭವಂತಿ ಪಾರ್ಥಿವಾಣವಃ |

ಕ್ರಮೇಣ ತದ್ವಿಸೃಷ್ಟಿರೀಶಶಕ್ತಿಪಾಕವೈಭವೇ

ಸಹಸ್ರಭಾನುಮನ್ಡಲಂ ತು ಗೋಚರಾದಿ ಗೃಹ್ಯತಾಂ ||13||

ಮಯೂಖಮಾಲಿಮಂಡಲೇ ನಿಧಾಯ ಪಾದಮುಗ್ರಯಾ

ಮಯೂಖಶಕ್ತಿರೂಪಯಾ ತ್ವಯಾsಮ್ಬ ಚೇಷ್ಟಮಾನಯಾ |

ಖಕೋಶತಃ ಸಮಾಹೃತೈಃ ಪುನಸ್ತ್ರಿರೂಪರೇಣುರ್ಭಿ -

ವ್ಯಧಾಯಿ ಮಂಗಲಾದಿಭಿಃ ಸಹ ಗ್ರಹೈರಿಯಂ ಮಹೀ ||14||

ವಿಸರ್ಜನೇನ ಭೂಯಸಾsಪಿ ದೇವ್ಯತೃಪ್ತಯೇಯತಾ

ವಿಚೇಷ್ಟಿತಂ ವಿಲಕ್ಷಣಂ ಪುನರ್ವ್ಯಧೀಯತ ತ್ವಯಾ |

ಇಹಾಂತರೇ ವಸುಂಧರಾಮಯೂಖಮಾಲಿಬಿಂಬರ್ಯೋ-

ಅಮುಷ್ಯ ಕರ್ಮಣಃ ಸವಿತ್ರಿ ಚಂದ್ರಮನ್ಡಲಂ ಫಲಂ ||15||

ವಧೂಪುಮಾಕೃತೀ ತತೋ ಬಭೂವಥುರ್ಯುವಾಂ ಶಿವೇ

ತ್ವಮೀಶ್ವರಶ್ಚ ಲೀಲಯಾ ವಿಹರ್ತುಮತ್ರ ವಿಷ್ಟಪೇ |

ಅಹೋ ಪ್ರಭುಂ ನಭಸ್ತನುಂ ತ್ವದೀಯಗರ್ಭಸಂಭವಾ-

ದ್ಭಣಂತಿ ಕಾಲಿ ತತ್ರ ಚಿತ್ರಭಾಷಣಾಸ್ತ್ವದಾತ್ಮಜಂ ||16||

ಪುಮಾನಥೋ ಸ ಬಿಂಬತೋ ಹಿರಣ್ಮಯೋ ದಿವಾಕರೇ

ಧಿಯಾsಪಿ ನೈವ ಕೇವಲಂ ಹಿರಣ್ಮಯೇನ ವರ್ಷ್ಮಣಾ |

ಇದಂ ತು ಕಾರ್ಯರೂಪಮನ್ಯದುಚ್ಯತೇ ಬುಧೈಃ ಪ್ರಭೋ-

ರಿಹಾಂತರೇ ನೃಣಾಂ ಪುನರ್ವಪುಸ್ತದಂಬ ಬಿಂಬಿತಂ ||17||

ಸ್ವಯಂ ಚ ಕಾಂಚನಪ್ರಕಾಶವರ್ಷ್ಮಣಾ ಪ್ರಭಾಕರೇ

ತಥಾsನ್ತರೇ ನೃಣಾಂ ಚ ತಸ್ಯ ಬಿಂಬಿತಾsಸಿ ಸನ್ನಿಧೌ |

ರಸಸ್ಯ ದೇವತಾsಸಿ ದೇವಿ ಪುಷ್ಕರೇ ದಿವಾಕರೇ

ಮಯೂಖದೇವತಾsಸಿ ಭೋಗದೇವತಾsಸಿ ದೇಹಿಷು ||18||

ವಿಸರ್ಜನೇನ ಭೂಯಸಾ ನಭಸ್ಯಮುತ್ರ ಭಾಸ್ಕರೇ

ಮಹೀಷು ಚಾಂಬಿಕೇ ಯುವಾಂ ವಿಧಾಯ ದೇಹಿನೋ ಬಹೂನ್ |

ಕ್ಷಿತೇಃ ಸುಧಾಕರಂ ಗತಾನ್ ಪಿತ್ರೂನ್ ವಿನೇತುಮವ್ಯಯೇ

ತನೂ ಚ ತತ್ರ ಬಭ್ರಥುಃ ಪ್ರಪಂಚರಾಜ್ಞಿ ಮಾಯಯಾ ||19||

ನಭೋsನ್ತರೇ ಹಿರಣ್ಮಯಂ ವಿಭುಂ ಪ್ರಚಕ್ಷತೇ ಹರಂ

ದೆನೇಶಬಿಂಬಬಿಂಬಿತಂ ಭಣಂತಿ ಪಂಕಜಾಸನಂ |

ಇಹಾಸ್ಮದಂತರಾಲಯಂ ವದಂತಿ ವಿಷ್ಣುಮಚ್ಯುತಂ

ಸವಿತ್ರಿ ಜನ್ಮಿನಾಮಿಯಂ ತ್ರಿಮೂರ್ತಿವಾದಿಧೋರಣಿ ||20||

ನಭೋನ್ತರೇ ಪ್ರಚಕ್ಷತೇ ಹಿರಣ್ಮಯಾಂಗಮೀಶ್ವರಂ

ದಿನೇಶಬಿಂಬಪೂರುಷಂ ಹಿರಣ್ಯಗರ್ಭಮಾಖ್ಯಯಾ |

ವಿರಾಜಮಾನಮಕ್ಷರಂ ವಿರಾಜಮಂತರೇ ನೃಣಾಂ

ಸವಿತ್ರಿ ತತ್ತ್ವವೇದಿನಾಮಿಯಂ ತಿ ನಾಮಕಲ್ಪನಾ ||21||

ಹಿರಣ್ಮಯಾಂಗಮಂಬರೇ ವದಂತಿ ಸೋಮಮಂಬಿಕೇ

ದಿವಾಕರಸ್ಯ ಮಂಡಲೇ ತು ಬಿಂಬಿತಂ ಪುರಂದರಂ |

ಶರೀರಿಣಾಮಿಹಾಂತರೇsಗ್ನಿಮಾಲಪಂತಿ ಭಾಸುರಂ

ಚಿರಂತನೋಕ್ತಿದರ್ಶಿನಾಮಿಯಂ ಶಿವೇ ಪ್ರಣಾಲಿಕಾ ||22||

ಸರೋರುಹಾಕ್ಷವಾಗ್ವಧೂಮನೋಹರೌ ತು ಪೂರ್ವವ-

ತ್ಸುದಾಂಶುಬಿಂಬಪೂರುಷಸ್ತು ರುದ್ರಸಂಜ್ಞಕಃ ಶಿವೇ |

ಹಿರಣ್ಮಯೋsನ್ತರಿಕ್ಷಜಾತ ಈಶ್ವರಃ ಸದಾಶಿವಃ

ಸದೇವ ವಸ್ತು ಕಾಂಚನಾಂಗಿ ಪಂಚಮೂರ್ತಿವಾದಿನಾಂ ||23||

ಪ್ರಭೋಃ ಪ್ರಮಾssದಿತಸ್ತತಃ ಪ್ರಮಾವತೀ ಸ್ವಯಂ ಪೃಥಗ್

ವಿಹಾಯಸಾ ಶರೀರಿಣೀ ಪ್ರಭೌ ತತೋ ಹಿರಣ್ಮಯೇ |

ಹಿರಣ್ಮಯಾಂಗನಾಕೃತಿರ್ನಭೋsನ್ತರೇ ಚ ಭಾಸ್ಕರೇ

ತಥಾsನ್ತರೇಷು ದೇಹಿನಾಂ ಮಹೇಶ್ವರೀ ಜಯತ್ಯುಮಾ ||24||

ಮದೀಯಮಂಬಿಕಾsಖಿಲಸ್ಯ ವಿಷ್ಟಪಸ್ಯ ದುಷ್ಟದೀ-

ದವಿಷ್ಠಪಾದಪಂಕಜಾ ಧುನೋತು ಕಷ್ಟಜಾಲಕಂ |

ಇಮೇಚ ಕೋಮಲೈಃ ಪದೇರಮೂಲ್ಯತಲ್ಪಶಾಲಿನ-

ಸ್ತದೀಯಮಂಚರೂಪತಾಂ ಭಜಂತು ಪಂಚಚಾಮರಾಃ ||25||        (50)

ಪುಷ್ಪಗುಚ್ಛ (ಸ್ತಬಕ) - 3

ಛಂದಸ್ಸು : ತನುಮಧ್ಯಾವೃತ್ತಂ

ಸಶರೀರಾಯಶ್ಚ ಸಾಧನಂ

ಶುಭ್ರಸ್ಮಿತಲೇಶೋ ಮಾತುರ್ಮರುತಾನ್ನಃ

ಅಂತಸ್ತಿಮಿರಾಣಾಮಂತಂ ವಿದಧಾತು ||1||

ಆದ್ಯೌ ಭುವನಾನಾಂ ಮಾತಾಪಿತರೌ ತೌ

ದೇವಾಸುರಮರ್ತ್ಯೈರ್ವಂದ್ಯಾವವಿನಿಂದ್ಯೌ||2||

ಬ್ರೂತೇ ಪೃಥಗೇಕಸ್ತೌ ವಿಗ್ರಹವಂತೌ

ಆಹೈಕಶರೀರಂ ದ್ವಂದ್ವಂ ಕವಿರನ್ಯಃ ||3||

ಶಕ್ತಿಂ ತನುಶೂನ್ಯಾಮೀಶಂ ಚ ಪುಮಾಂಸಂ

ವಕ್ತಿ ಪ್ರಮದಾಯಾಂ ಸಂದೇಹಯುತೋsನ್ಯಃ ||4||

ಈಶಂ ಚ ತಮೇಕೇ ಸನ್ಮಾತ್ರಮುಶಂತಿ

ಬ್ರಹ್ಮೈಕಮಥಾನ್ಯೇ ಗಾಯಂತಿ ನ ಶಕ್ತಿಂ ||5||

ಕೇಚಿತ್ತನುಹೀನಂ ಪ್ರಜ್ಞಾಯುತಮೀಶಂ

ಶಕ್ತಿಂ ವಿದುರಸ್ಯ ಪ್ರಜ್ಞಾಮವಿಕುಂಠಾಂ ||6||

ಉಕ್ತಂ ದಧತಸ್ತೈಃ ಕೇಚಿತ್ ಪುನರಾಹುಃ

ಮಾಯಾತನುಬಂಧಂ ನಾಥಸ್ಯ ನ ಶಕ್ತೇಃ ||7||

ನಿತ್ಯಂ ಸಶರೀರೌ ಯೇಷಾಂ ಪಿತರೌ ತೌ

ಏಕೋsಪ್ಯಥವಾ ತಾನ್ ಪ್ರತ್ಯಾಹ ನಿಸರ್ಗಃ ||8||

ಮಾತಾ ಪಿತರೌ ಯತ್ ತಾವೇಕಶರೀರೌ

ಚಿತ್ರಪ್ರಥನಾರ್ಥಾ ಸಾ ಕಾಚನ ಲೀಲಾ ||9||

ಸನ್ಮಾತ್ರಕಥಾನಾಂ ಕಾರ್ಯೇ ಮನುಜಾದೌ

ಧೀಸ್ವಾಂತವಿಕಾಸಃ ಸ್ಯಾತ್ಕಾರಣಹೀನಃ ||10||

ಅದ್ವೈತಿಭಿರನ್ಯಾ ಮಾಯಾssಶ್ರಣೀಯಾ

ಶಕ್ತೇರತಿರಿಕ್ತಾ ಸಾ ಕಿಂ ಕಿಮು ವಾದೈಃ ||11||

ನ ಸ್ಯಾತ್ ಪೃಥಗಾತ್ಮಾ ಶಕ್ತೇಃ ಕಿಮುಪಾಧೇಃ

ಚಕ್ಷುಃ ಶ್ರಿತಚಿತ್ತೇರ್ವಿಶ್ವಾಕೃತಿತಾ ವಾ ||12||

ಏಕಾಂತವಿದೇಹೌ ತೌ ಚೇದತಿಸೂಕ್ಷ್ಮೌ

ಲೀಲಾತನುಬಂಧಾಶಕ್ತಾವಭಿದೇಯೌ ||13||

ಭಕ್ತಾನನುಗೃಹ್ಣನ್ ದಿವ್ಯಾದ್ಭುತಲೀಲಃ

ತದ್ವಿಗ್ರಹಬಂಧೋ ಬೋಧ್ಯೋ ಲದದರ್ಥಃ||14||

ಸ್ತ್ರೀತ್ವಂ ಯದಿ ನೇಷ್ಟಂ ಪುಂಸ್ತ್ವಂ ಕುತ ಇಷ್ಟಂ

ನಾ ವಾ ಕಿಮು ನಾರೀ ನ ಸ್ಯಾದನುಮೇಯಾ ||15||

ತಸ್ಮಾತ್ ಪಿತರೌ ತೌ ವಾಚ್ಯೌ ಮತಿಮಂತೌ

ಸೂಕ್ಷ್ಮಾವಪಿ ಭೂಯೋ ಲೀಲಾತನುಮಂತೌ ||16||

ನಾಸ್ಮತ್ತನುವತ್ತೇ ಶಕ್ತೀಶ್ವರಮೂರ್ತಿ

ಏಕಾಮೃತರೂಪಾ ತ್ವನ್ಯಾ ಪ್ರಣವಾತ್ಮಾ ||17||

ದಿವ್ಯಂ ಘನತೇಜಃ ಕುರ್ವದ್ ಧ್ವನಿಮಂತಃ

ಸಂಪಶ್ಯದಶೇಷಂ ಮೂರ್ತಿಃ ಪ್ರಣವಾತ್ಮಾ ||18||

ದಿವ್ಯೋ ಘನಸೋಮಃ ಸ್ಯಂದನ್ ರಸಮಂತಃ

ಭುಂಜನ್ ಭುವನೌಘಂ ಪೀಯೂಷಶರೀರಂ ||19||

ಬೋಧೋsನವಲಂಬೋ ದಿವ್ಯಂ ಖಲು ತೇಜಃ

ಮೋದಃ ಪರಿಶುದ್ಧೋ ದಿವ್ಯಃ ಖಲು ಸೋಮಃ ||20||

ಸೋಮಾಂಶಮಹೋಂಶೌ ಯಾತೋ ಘನಭಾವಂ

ಪಿತ್ರೋರ್ಭುವನಾನಾಂ ಸಂಕಲ್ಪಮಹಿಮ್ನಾ||21||

ಆರಾಧಯಸೀಶಂ ತಂ ಚಿನ್ಮಯಕಾಯಂ

ಆನಂದಮಯಾಂಗೀ ತ್ವಂ ದೇವಿ ಕಿಲೇಯಂ ||22||

ದಿವ್ಯಂ ತವ ಕಾಯಂ ದಿವ್ಯೇ ತವ ವಸ್ತ್ರೇ

ದಿವ್ಯಾನಿ ತವಾಂಬ ಸ್ವರ್ಣಾಭರಣಾನಿ ||23||

ಯದ್ದೇವಿ ವಿಲೋಕ್ಯಾsಸ್ಯಪ್ರಾಕೃತಕಾಯಾ

ಯುಕ್ತೀಃ ಸಮತೀತಾ ಸೇಯಂ ತವ ಮಾಯಾ ||24||

ನವ್ಯಾಸ್ತನುಮಧ್ಯಾಃ ಪ್ರತ್ನಾಂ ತನುಮಧ್ಯಾಂ

ವಿದ್ವತ್ಸದಸೀಮಾಃ ಸಮ್ಯಕ್ಪ್ರಥಯಂತು ||25||             75

ಪುಷ್ಪಗುಚ್ಛ (ಸ್ತಬಕ) - 4

ಛಂದಸ್ಸು - ಗೀತಿವೃತ್ತಂ

ಆಧ್ಯಾತ್ಮಿಕವಿಭೂತಯಃ

ಅಮೃತಾಂಶುಬಿಂಬಸಾರಾದ್ ಭಯೋsಪಿ ವಿನಿರ್ಗತೋ ಭೃಶಂ ಸೂಕ್ಷ್ಮಃ

ಸಾರೋ ಗೌರೀವದನಾದ್ ದರಹಾಸೋ ಹರತು ದುಃಖಜಾಲಂ ನಃ ||1||

ಕುಲಕುಂಡೇ ಪ್ರಾಣುವಂತೀ ಚೇತಂತೀ ಹೃದಿ ಸಮಸ್ತಜಂತೂನಾಂ

ಮೂರ್ಧನಿ ವಿಚಿಂತಯಂತೀ ಮೃತ್ಯುಂಜಯಮಹಿಷಿ ವಿಜಯತೇ ಭವತಿ||2||

ತೇಜೋಜಲಾನ್ನಸಾರೈಸ್ತ್ರಯೋsಣವೋ ಮೂಲಹೃದಯಮಸ್ತೇಷು

ಪಾಕಾತ್ತೇ ನಿಷ್ಪನ್ನಾಸ್ತ್ರೈಲೋಕ್ಯವ್ಯಾಪಿಕೇsಮ್ಬಾ ದೇಹವತಾಂ ||3||

ಪೂರ್ಣೇ ಶರೀರಶಿಲ್ಪೇ ದ್ವಾರೇಣ ಬ್ರಹ್ಮರಂಧ್ರಸಂಜ್ಞೇನ

ನಾಡೀಪಥೇನ ಗತ್ವಾ ತೈಜಸಮಣುಮಾವಿಶಸ್ಯಮೇಯಬಲೇ ||4||

ಅಂಶೇನಾವಿಶ್ಯಾದೌ ಯಾಸಿ ಪುನಸ್ತಂ ತತಶ್ಚ ನಿರ್ಯಸಿ

ಮಾರ್ಗಾಭ್ಯಾಂ ದ್ವಾಭ್ಯಾಂ ತ್ವಂ ನಾಡ್ಯಾಃ ಪಶ್ಚಾತ್ ಪುರಶ್ಚ ಸಿದ್ಧಾಭ್ಯಾಂ ||5||

ಯಾತಾಯಾತವಿಹಾರೇ ಮಾತಸ್ತಸ್ಮಿನ್ ಭವತ್ಯುಪಾಧಿಸ್ತೇ

ಆರಭ್ಯ ಮಸ್ತಕಸ್ಥಲಮಾಮೂಲಾಧಾರಮಸ್ಥಿಪಂಜರಿಕಾ ||6||

ನೃತನುಷು ವಿಹರಂತೀಂ ತ್ವಾಂ ಉಪಾಧಿವೀಣಾಕೃತೇರ್ಜಗನ್ಮಾತಃ

ಸಾದೃಶ್ಯಾತ್ ಕುಂಡಲಿನೀಂ ಪರೋಕ್ಷವಾದಿಪ್ರಿಯಾಃ ಪ್ರಭಾಷಂತೇ ||7||

ನಭಸಃ ಶೀರ್ಷದ್ವಾರಾ ಪ್ರವಹಂತೀಂ ಯ ಇಹ ವಿಗ್ರಹೇ ಶಕ್ತಿಂ

ಅನುಸಂದಧಾತಿ ನಿತ್ಯಂ ಕೃತಿನಸ್ತಸ್ಯೇತರೈರಲಂ ಯೋಗೈಃ ||8||

ಸರ್ವೇಷು ವಿಶಸಿ ತುಲ್ಯಂ ನಿರ್ಗಚ್ಛಸಿ ತುಲ್ಯಮಂಬ ಭುವನಾನಾಂ

ಜ್ಞಾತಾ ಚೇದಸಿ ಶಕ್ತ್ಯೈ ನ ಜ್ಞಾತಾ ಚೇದ್ಭವಸ್ಯಹಂಕೃತ್ಯೈ ||9||

ಅವತರಣಂ ಧ್ಯಾತಂ ಚೇದ್ ಆರೋಹಣಮದ್ಭುತಂ ಭವೇಚ್ಛಕ್ತೇಃ

ಯಸ್ಮಿನ್ನಿದಂ ಶರೀರಂ ಭವತಿ ಮಹದ್ವೈದ್ಯುತಾಗ್ನಿಯಂತ್ರಮಿವ ||10||

ಆರೋಹಣಮಧ್ಯಾತೃಷು ಹೃದಯೇsಹಂಕಾರಮಾತ್ರನಿಷ್ಪತ್ಯೈ

ತದನು ಶರೀರಮಿದಂ ಸ್ಯಾತ್ ಸುಖಾಯ ದುಃಖಾಯ ವಾ ಯಥಾಭೋಗಂ ||11||

ಯಾ ವ್ಯಕ್ತಿತಾ ಜನಿಮತಾಮಹಂಕೃತಿಃ ಸಕಲಭೇದಧೀಭೂಮಿಃ

ಪೃಥಗಿವ ತವಾಂಬಿಕೇ ಸಾ ಸತ್ತೈವೋಪಾಧಿಸಂಶ್ರಯಾದ್ ಭಾಂತೀ ||12||

ಏತಾಮಾಹುರವಿದ್ಯಾಂ ಬೀಜಂ ಸಂಸಾರವೃಕ್ಷರಾಜಸ್ಯ

ಸರ್ವರಸಫಲಯುತಸ್ಯ ಪ್ರಾರಬ್ಧಜಲೇನ ದೇವಿ ದೋಹದಿನಃ ||13||

ವ್ಯಕ್ತಿತ್ವಾರ್ಪಕದೇಹೇ ನಿಮ್ನೇ ಕುಲ್ಯೇವ ಜನಿಮತಾಂ ಮಾತಃ

ಪ್ರವಹತ್ಯನಾರತಂ ತೇ ಶಕ್ತಿಶ್ಚಿತ್ರಾಣಿ ದೇವಿ ತನ್ವನಾ ||14||

ಸಾರಮಪಾಮಣುಭೂತಂ ಹೃದಯಸ್ಥಂ ಸೂರಯೋ ವಿದುಶ್ಚಿತ್ತಂ

ಶ್ರೇಷ್ಠಂ ಪ್ರಾಣಂ ಕೇಚನ ಪಂಚಾನಿಲಮೂಲಭೂತಮಾಹುರಿಮಂ ||15||

ಮನ ಏವ ಚಿತ್ತಸಂಜ್ಞಂ ವ್ಯವಹರತಾಂ ವಿಭಜನಾನಭಿಜ್ಞಾನಾಂ

ಕವಿಲೋಕವ್ಯವಹಾರಸ್ತದಧೀನಸ್ತತ್ತ್ವಧೀರ್ಭವತ್ಯನ್ಯಾ ||16||

ತದನಾಹತಸ್ಯ ವಿಲಸದ್ ದಕ್ಷಿಣತೋ ದಹರನಾಮಕಗುಹಾಯಾಂ

ಚಿತ್ತಂ ಕುಲಕುಂಡಾತ್ತೇ ಕಾsಪ್ಯನುಗೃಹ್ಣಾತಿ ದೇವಿ ರಶ್ಮಿಕಲಾ ||17||

ಚಿತ್ತಮಣು ಶ್ಲಿಷ್ಟಂ ತೇ ಕಲಯಾsಙುಷ್ಠಪ್ರಮಾಣಮಿವ ಭಾಸಾ

ದರ್ಪಣಮಮಲಬ್ರಹ್ಮಪ್ರತಿಬಿಂಬಾಕರ್ಷಕಂಶಿವೇ ಭವತಿ ||18||

ಅಂತರಮಾವರ್ತಾಭಂ ಪ್ರತಿಬಿಂಬಮಕಾಯಮೇತದೀಶಸ್ಯ

ಅಂಗುಷ್ಠಾಭಂ ಪ್ರಾಹುರ್ಮಾಹೇನೋಪಾಧಿಚೈತ್ತಭಾದಸ್ತೇ||19||

ದಂಪತ್ಯೋರ್ವಾಂ ರೂಪಪ್ರತಿಬಿಂಬೌ ಚಕ್ಷುಷೋಃ ಶಿವೇ ಭವತಃ

ಕುಲಕುಂಡೇ ಹೃದಯೇ ಚಾಪ್ಯರೂಪಯೋರೇವ ಕಶ್ಚಿದುಲ್ಲಾಸಃ ||20||

ಚಿತ್ತಮಣೀಯೋ ವಿತ್ತಂ ಯ ಇದಂ ಮೂಲ್ಯೇ ಪ್ರಪಂಚತೋsಪ್ಯಧಿಕಂ

ಹೃದಯಗುಹಾಯಾಂ ನಿಹಿತಂ ಜಾನೀತೇ ಸ ವಿಜಹಾತಿ ಬಹಿರಾಶಾಃ ||21||

ಅಪ್ರಾಪ್ತಾ ಮೂರ್ಧಾನಾಂ ಹೃದಯಾತ್ ಸಂಪ್ರಸ್ಥಿತಾ ಧೃತಾ ನಾಡ್ಯಾ

ತ್ವದ್ರುಚಿರುಕ್ತಾ ಬುದ್ಧಿಸ್ತ್ವಯಿ ನಿಷ್ಠಾ ಭವತಿ ದೇವಿ ತನ್ನಿಷ್ಠಾ ||22||

ಅನ್ನಮಯಾಣುಂ ಪ್ರಾಪ್ತಂ ಧೀಜ್ಯೋತಿಶ್ಚಂದ್ರಮಾರ್ಕಮಿವ ತೇಜಃ

ಪರಿಭಾಷ್ಯತೇ ಮಹೇಶ್ವರಿ ಮನ ಇತಿ ಸಂಕಲ್ಪಸಂಭವಸ್ಥಾನಂ ||23||

ಸಂಕಲ್ಪೇ ಸಂಕಲ್ಪೇ ಚಿಚ್ಛಕ್ತಿಂ ಮನಸಿ ವಿಸ್ಫುರಂತೀಂ ತ್ವಾಂ

ಯ ಉಪಾಸ್ತೇ ಸ ಜನಸ್ತೇ ಗೃಹ್ಣಾತಿ ಮಹೇಶವಲ್ಲಭೇ ಚರಣಂ ||24||

ಆಧಾರಚಕ್ರಶಯನೇ ಮಮೇಹ ನಿದ್ರಾಂ ವಿಹಾಯ ವಿಚಲಂತೀಂ

ಗೀತಯ ಏತಾಃ ಪರಮಾಮುಪತಿಷ್ಠಂತಾಂ ಜಗದ್ವಿಭೋಃ ಕಾಂತಾಂ ||25||   100

|| ಸಮಾಪ್ತಂ ಚ ಪ್ರಥಮಂ ಶತಕಂ ||

ದ್ವಿತೀಯ ಶತಕ

ಪುಷ್ಪಗುಚ್ಛ (ಸ್ತಬಕ) - 5

ಛಂದಸ್ಸು - ಉಪಜಾತಿವೃತ್ತಂ

ಪರಿಣಯಃ

ಶ್ರೀಖಂಡಚರ್ಚಾಮಿವ ಕಲ್ಪಯಂತ್ಯೋ

ಮುಹುಃ ಕಪೋಲೇಷು ಸಖೀಜನಸ್ಯ

ಶ್ರೀಕಂಠಕಾಂತಾಹಸಿತಾಂಕುರಾಣಾಂ

ಶ್ರೀಮಂತಿ ಕುರ್ವಂತು ಜಗಂತಿ ಭಾಸಃ ||1||

ಕೀರ್ತಿರ್ವಲಕ್ಷಾ ಕುಸುಮಾಯುಧಸ್ಯ

ಸ್ವರ್ಣಾದ್ರಿಕೋದಂಡಕಯೋನ್ನತಸ್ಯ

ದರಸ್ಮಿತಶ್ರೀರ್ದ್ವಿರದಾಸ್ಯಮಾರ್ತು-

ದ್ರಾಘೀಯಸಂ ವೋ ವಿತನೋತು ಭೂತಿಂ||2||

ಪ್ರಮಥ್ಯಮಾನಾಮೃತರಾಶಿವೀಚಿ-

ಪ್ರೋದ್ಗಚ್ಛದಚ್ಛಾಚ್ಛತುಷಾರಕಲ್ಪಾಃ

ಯುಷ್ಮಾಕಮಿಚ್ಛಾಂ ವಿದಧತ್ವಮೋಘಾಂ

ವಿಘ್ನೇಶಮಾತುರ್ದರಹಾಸಲೇಶಾಃ ||3||

ಚಂದ್ರಾತಪಃ ಕಶ್ಚನ ಸಂಪ್ರಸನ್ನೋ

ಮಹೇಶನೇತ್ರಾತಿಥಿತರ್ಪಣೋ ನಃ

ಮನೋಭಿಲಾಷಂ ಸಫಲೀಕರೋತು

ಮಹೇಶ್ವರೀಹಾಸಲವಪ್ರಕಾಶಃ ||4||

ವಲಕ್ಷವಕ್ಷೋಜಪಟಾಂಚಲೇನ

ಚಲೇನ ಸಾರ್ಧಂ ಕೃತಕೇಲಯೋ ನಃ

ಪುರತ್ರಯಾರಾತಿಕಲತ್ರಹಾಸ-

ಭಾಸೋ ನಿರಾಸಂ ವಿಪದಾಂ ಕ್ರಿಯಾಸು ||5||

ಭೂಯಾಸುರಾಯಾಸಹರಾಣಿ ತಾನಿ

ಸ್ಮಿತಾನಿ ಭೂತೇಶಮೃಗೀದೃಶೋ ನಃ

ಯೇಷಾಂ ತ್ವಿಷೋ ಬಿಭ್ರತಿ ದಿಗ್ವಧೂಟೀ-

ಗಂಡೇಷು ಕರ್ಪೂರಪರಾಗಲೀಲಾಂ ||6||

ಕುರ್ವಂತು ಕಾಮಂ ಸಫಲಂ ತ್ವ ಮದೀಯಂ

ಕುಲಾದ್ರಿಕನ್ಯಾಹಸಿತಾನಿ ತಾನಿ

ಯೇಷಾಂ ಮಯೂಖೈಃ ಕ್ರಿಯತೇ ಸಿತಾರ್ದೇ-

ಉದ್ಯಾನವಾಟೀಷು ನವೋ ವಸಂತಃ ||7||

ಆಮ್ರೇಡಿತಂ ಭೂಷಣಚಂದ್ರಭಾಸಾಂ

ನಾಸಾವಿಭೂಷಾಮಹಸಾಂ ದ್ವಿರುಕ್ತಿಃ

ಪುರಾರಿನಾರೀಸ್ಮಿತಕಾಂತಯೋ ಮೇ

ಪೂರ್ಣಾನಿ ಕುರ್ವಂತು ಸಮೀಹಿತಾನಿ ||8||

ನಿರ್ಮಾಯ ವಿಶ್ವಾಲಯಮಂಬ ಶರ್ವ-

ಸ್ತ್ವಯಾ ಸಮಂ ಶಿಲ್ಪವಿದಾ ಸ ಶಿಲ್ಪೀ

ವಿಹರ್ತುಮಿಚ್ಛನ್ನಯಿ ವೋಢುಮೈಚ್ಛ-

ನ್ನಾರೀಂ ಭವಂತೀಂ ಪುರುಷೋ ಭವಂಸ್ತ್ವಾಂ ||9||

ದಿವ್ಯಂ ದುಕೂಲಂ ಧವಲಂ ದಧಾನಾ

ವೇಣ್ಯಾ ಫಣೀಂದ್ರೋಪಮಯಾ ಲಸಂತೀ

ಪ್ರಫುಲ್ಲರಾಜೀವವಿಲೋಚನಾ ತ್ವಂ

ಪ್ರಪಂಚಭರ್ತುರ್ನಯನಾನ್ಯಹಾರ್ಷೀಃ ||10||

ಪ್ರತ್ಯಂಗಬಂಧಂ ಜ್ವಲದುತ್ತಮಂ ತೇ

ಭುಜಂಗರಾಜೋಪಮವೇಣಿರೂಪಂ

ಆತ್ಮೈಕನಿಷ್ಠಸ್ಯ ಚ ವಿಶ್ವಭರ್ತರ್ಯ-

ಆರಾಧಯಾಮಾಸ ವಿಲೋಚನಾನಿ ||11||

ಅಭೂಸ್ತ್ವಮಾದ್ಯಸ್ಯ ಮನೋಮದಾಯ

ಸ ಚಾಪಿ ತೇ ಪ್ರೀತಿಪದಂ ಬಭೂವ

ನ ಕೇವಲಂ ವಾಂ ಸಕಲಸ್ಯ ಚಾಸೀ-

ದ್ದಾಂಪತ್ಯಬಂಧಸ್ಯ ತದಂಬ ಬೀಜಂ ||12||

ತವಾತಿಕಾಂತಾ ನಯನಾಂತವೃತ್ತಿ-

ರ್ಹಾಸಃ ಪುರಾರೇಶ್ಚ ನವೇಂದುಹಾರೀ

ಉಭೌ ವಿವಾಹೋತ್ಸವಪೂರ್ವರಂಗಂ

ನಿರ್ವರ್ತಯಾಮಾಸತುರಾದಿರಾಮೇ ||13||

ದಾತುಂ ಪ್ರಭುಃ ಸಾಂತ್ವಯಿತುಂ ಸಮರ್ಥಃ

ಕರ್ತುಂ ಕ್ಷಮಸ್ತರ್ಜಯಿತುಂ ಚ ಶಕ್ತಃ

ಸಂರಕ್ಷತಾನ್ಮಾಂ ತವ ಸರ್ವ ವಂದ್ಯೇ

ಕರಸ್ತುಷಾರಾಂಶುಭೃತಾ ಗೃಹೀತಃ ||14||

ಸ್ಪ್ರಷ್ಟುಂ ನ ಶಕ್ಯಾ ಪರಮೇ ಪರೈಸ್ತ್ವಂ

ಸ ಚಾನ್ಯಯಾ ಚಿಂತಯಿತುಂ ನ ಶಕ್ಯಃ

ತ್ವಮೇವ ಶರ್ವಸ್ಯ ಸ ಏವ ತೇsಮ್ಬ

ದಾಂಪತ್ಯಮೇವಂ ಯುವಯೋಸ್ತು ಸತ್ಯಂ||15||

ನಿಜಾದ್ವತಂಸೇಂದುತ ಇಂದುಮನ್ಯ-

ಮುತ್ಪಾದ್ಯ ತೇ ಶಂಭುರದಾದ್ವತಂಸಂ

ಮೂರ್ತಾಮಿವಾಸೌ ಶುಭಗಾತ್ರಿ ರಾತ್ರಿಂ

ಪ್ರಾಪ್ಯ ತ್ವದೀಯಾಂ ಕಬರೀಂ ಚಕಾಸೇ ||16||

ಬಭೂವಿತಾಗೇಂದ್ರಗೃಹೇ ಯದಾ ತ್ವಂ

ಸ ಚೇಶ್ವರಸ್ತತ್ರ ಚಕಾರ ವಾಸಂ

ವಿಲೋಕಮಾನಸ್ತವ ದೇವಿ ವಿದ್ಯುತ್

ಪಾಂಚಾಲಿಕಾಯಾಃ ಕಮನೀಯಭಾವಂ ||17||

ಸಿದ್ಧಂ ಸ ವಾಂ ಸಾಧಯಿತುಂ ಪ್ರವೃತ್ತೋ

ಯೋಗಂ ಪ್ರದಗ್ಧೋ ಮದನಶ್ಚ ಕಲ್ಪೇ

ವಶೀತಿ ಕೀರ್ತಿಂ ಗಿರಿಶಸ್ಯ ಭರ್ತುಂ

ತುಭ್ಯಂ ತ್ವಪರ್ಣೇತಿ ಯಶಶ್ಚ ಕರ್ತುಂ ||18||

ಘೋರಂ ತಪಶ್ಚೇಂದ್ರಚಿತಂ ತ್ವಯಾsಪಿ

ಪ್ರಾಗ್ರೂಪಭರ್ತುಃ ಸಮನುಗ್ರಹಾಯ

ವಿಹಾಯ ಯತ್ನಂ ಕ ಇಹಾಖಿಲಾsಮ್ಬ

ಸಂಬದ್ಧಮುಪ್ಯರ್ಥಮುಪೈತು ಜಂತುಃ ||19||

ಜ್ವಲತ್ಕಪರ್ದೋ ದಹನಾಂಕಭಾಲಃ

ಕಪಾಲಮಾಲೀ ಕರಿಕೃತ್ತಿವಾಸಾಃ

ಭುಜಂಗಭೂಷೋ ಭಸಿತಾಂಗರಾಗಃ

ಪುಷ್ಪೇಷು ವೈರೀ ಪುರುಷಾಟ್ಪಹಾಸಃ ||20||

ಶ್ಮಶಾನವಾಸೀ ಪುರುಷಸ್ತ್ರಿಶೂಲೀ

ಜಹಾರ ತೇ ಚೇದನಘಾಂಗಿ ಚೇತಃ

ದೃಷ್ಟಾಂತಮರ್ಥೋsಯಮವಾಪ ನೈವ

ಪ್ರೀತಿರ್ಬಹಿಃಕಾರಣಮಾಶ್ರಿತೇತಿ ||21||

ರೂಪಂ ಪುರಾರೇರಥವಾ ತದೇತತ್

ಸೇಯಂ ಚ ಚೇಷ್ಟಾ ಸಮಯಾಂತರೇಷು

ಕಾಂತಂ ವಪುಃ ಕಾಂತತರಾಶ್ಚ ಲೀಲಾ-

ಸ್ತ್ವಯಾ ಸಮಂ ಖೇಲಿತುಮೇಷ ಧತ್ತೇ ||22||

ಪ್ರಹೃಷ್ಟಯಕ್ಷಃ ಸಮವೇತಸಿದ್ಧೋ

ನೃತ್ಯದ್ಗಣೇಂದ್ರೋ ವಿಕಸನ್ಮುನೀಂದ್ರಃ

ಭೂಯೋsಪಿ ಯೋಗೋ ಯುವಯೋರ್ಹಿಮಾದ್ರೌ

ಬಭಾರ ಮಾತರ್ಮಹಮದ್ವಿತೀಯಂ ||23||

ಮಹೇಶ್ವರಸ್ತ್ವಾಂ ಪರಿಣೀಯ ಲೇಭೇ

ಯಾವಾತ್ಮಜೌ ದ್ವಾವನಘಾಂಗಿ ಮುಖ್ಯೌ

ಏಕಸ್ತಯೋರ್ಭ್ರಾಮ್ಯತಿ ವಿಶ್ವಮತ್ತುಂ

ಭೂಭೃತ್ತಟೀರಾಶ್ರಯತೇ ಬತಾನ್ಯಃ ||24||

ಸಂಕೀರ್ತಯಂತ್ಯೋ ಜಗತಾಂ ಜನನ್ಯಾಃ

ಕಲ್ಯಾಣವಾರ್ತಾಃ ಕಮನೀಯಕೀರ್ತೇಃ

ಇಮಾಃ ಪ್ರಮೋದಾಯ ಸತಾಂ ಭವಂತು

ಸಂದರ್ಭಶುದ್ಧಾ ಉಪಜಾತಯೋ ನಃ ||25||             125  

ಪುಷ್ಪಗುಚ್ಛ (ಸ್ತಬಕ) - 6

ಛಂದಸ್ಸು - ಮದಲೇಖಾವೃತ್ತಂ

ಮಹಾಭಾಗ್ಯಂ

ಹರ್ತಾರಃ ಶಶಿಕೀರ್ತೇಃ ಕರ್ತಾರೋ ನವಭಾಸಾಂ

ಭರ್ತಾರೋ ಮಮ ಸಂತು ಸ್ಕಂದಾಂಬಾದರಹಾಸಾಃ ||1||

ದಿಗ್ವಲ್ಲೀಷ್ವತಿಶುಭ್ರಾಂ ಕುರ್ವಂತಃ ಕುಸುಮರ್ದ್ಧಿಂ

ಭೂಯಾಸುಸ್ತವ ಭೂತ್ಯೈ ಮನ್ಮಾತುಃ ಸ್ಮಿತಲೇಶಾಃ ||2||

ಏಕಶ್ಚೇತ್ತವ ಶಕ್ತೋ ಬ್ರಹ್ಮಾಂಡಸ್ಯ ಭವಾಯ

ಭರ್ಗಪ್ರೇಯಸಿ ಹಾಸಃ ಕಿಂ ಸ್ತೋತ್ರಂ ತವ ಭೂಯ ||3||

ಉದ್ಯಾನೇ ವಿಯದಾಖ್ಯೇ ಕಾಲಿ ತ್ವಾಂ ವಿಹರಂತೀಂ

ಗೋಲೈಃ ಕಂದುಕಕಲ್ಪೈರಲ್ಪಾ ವಾಕ್ಕಿಮು ಮಾತಿ ||4||

ಖಂ ಕ್ರೀಡಾಭವನಂ ತೇ ಕಃ ಕಾರ್ಯಾಲಯ ಏಷಃ

ಪೃಥ್ವೀಯಂ ಬಹುಲಾನ್ನಾ ಮಾತರ್ಭೋಜನಶಾಲಾ ||5||

ಬುದ್ಧೀನಾಮಸಿ ದಾತ್ರೀ ಸಿದ್ಧೀನಾಮಸಿ ನೇತ್ರೀ

ವೀರ್ಯಾಣಾಮಸಿ ಪೇಟೀ ಕಾರ್ಯಾಣಾಮಸಿ ಧಾಟೀ ||6||

ವಿದ್ಯಾನಾಮಸಿ ಭಾವೋ ಹೃದ್ಯಾನಾಮಸಿ ಹಾವಃ

ದೇವಾನಾಮಸಿ ಲೀಲಾ ದೈತ್ಯಾನಾಮಸಿ ಹೇಲಾ ||7||

ಗಂತ್ರೂಣಾಮಸಿ ಚೇಷ್ಟಾ ಸ್ಥಾಣೂನಾಮಸಿ ನಿಷ್ಠಾ

ಲೋಕಾನಾಮಸಿ ಮೂಲಂ ಲೋಕಾದೇರಸಿ ಜಾಲಂ ||8||

ದೇವೀ ವ್ಯಾಪಕತೇಜಃ ಶಕ್ತಿಸ್ತತ್ತ್ವವಿಚಾರೇ

ಅತ್ಯಂತಂ ಸುಕುಮಾರೀ ನಾರೀ ಮೂರ್ತಿವಿಚಾರೇ ||9||

ಕ್ವ ಜ್ಯೋತಿರ್ಮಹತೋsಸ್ಮಾದಾಕಾಶಾದಪಿ ಭೂಯಃ

ತತ್ಸರ್ವಂ ವಿನಯಂತೀ ತನ್ವಂಗೀ ಕ್ವ ನು ನಾರೀ ||10||

ದೇವೇಂದ್ರಾಯ ವಿಭುತ್ವಂ ಸೂರ್ಯಾಯೋಸ್ರಸಹಸ್ರಂ

ಊಷ್ಮಾಣಂ ದಹನಾಯ ಜ್ಯೋತ್ಸ್ನಾಮೋಷಧಿರಾಜೇ ||11||

ವಾತಾಯಾಮಿತವೀರ್ಯಂ ವಿಸ್ತಾರಂ ಗಗನಾಯ

ಸಾಂದ್ರತ್ವಂ ವಸುಧಾಯೈ ತೋಯಾಯ ದ್ರವಭಾವಂ ||12||

ಮಾಹಾಭಾಗ್ಯಮಪಾರಂ ಕೋಟಿಭ್ಯೋ ವಿಬುಧಾನಾಂ

ಚಿತ್ರಾಃ ಕಾಶ್ಚನ ಸಿದ್ಧೀರ್ಲಕ್ಷೇಭ್ಯೋ ಮನುಜಾನಾಂ ||13||

ಸ್ಥಾಣುಭ್ಯೋ ಧೃತಿಶಕ್ತಿಂ ಗಂತೃಭ್ಯೋ ಗತಿಶಕ್ತಿಂ

ಕಸ್ಮಾಚ್ಚಿನ್ನಿಜಕೋಶಾದೇಕಾ ದೇವಿ ದದಾನಾ ||14||

ಆಶ್ಚರ್ಯಂ ವಿದಧಾನಾ ಸರ್ವಂ ವಸ್ತು ದಧಾನಾ

ಹಂತ ತ್ವಂ ಮಮ ಮಾತಃ ಕಾಚಿತ್ಕೋಮಲಗಾತ್ರೀ ||15||

ಶ್ರೋಣೀಭಾರನತಾಯಾಂ ಕಸ್ಯಾಂಚಿತ್ತನುಗಾತ್ರ್ಯಾಂ

ಈದೃಕ್ಷಾ ಯದಿ ಶಕ್ತಿಃ ಕಾವೇತೋ ನನು ಮಾಯಾ ||16||

ರೂಪಂ ತೇ ತನುಗಾತ್ರಂ ವಾಣೀ ತೇ ಮೃದುನಾದಾ

ಚಾಪಂ ತೇ ಮಧುರೇಕ್ಷುಃ ಪಾಣಿಸ್ತೇ ಸುಕುಮಾರಃ ||17||

ಲೋಲೇ ಲೋಚನಯುಗ್ಮೇ ಭೀರುತ್ವಂ ಪ್ರಕಟಂ ತೇ

ಬ್ರಹ್ಮಾಂಡಂ ತ್ವದಧೀನಂ ಶ್ರದ್ಧಾತ್ತಾಮಿಹ ಕೋ ವಾ ||18||

ಭ್ರೂಭಂಗಂ ಕುರುಷೇ ಚಿನ್ಮುಗ್ಧೇ ಗೌರಿ ಮುಖಾಬ್ಜೇ

ಭೂತಾನ್ಯಪ್ಯಯಿ ಬಿಭ್ಯತ್ತೇಜೇರನ್ನಪಿ ತಾರಾಃ ||19||

ಶುದ್ಧಾಂತೇಶ್ವರಿ ಶಂಭೋರಿಚ್ಛಾ ಚೇತ್ತವ ಕಾsಪಿ

ಘೋರೋsಗ್ನಿಸ್ತೃಣುಗರ್ಭಾದ್ಘೋರಾಗ್ನೇರಪಿ ಶೈತ್ಯಂ ||20||

ದ್ರಷ್ಟುಂ ವಿಶ್ವಮಪಾರಂ ಭಾರಸ್ತೇ ದಯಿತಸ್ಯ

ಕರ್ತುಂ ಕಾರ್ಯಮಶೇಷಂ ಶ್ರೀಮಾತಸ್ತವ ಭಾರಃ ||21||

ಸಾಕ್ಷೀ ಕೇವಲಮೀಶಃ ಕರ್ತುಂ ಭರ್ತುಮುತಾಹೋ

ಹರ್ತುಂ ವಾsಖಿಲಮಂಬ ತ್ವಂ ಸಾಕ್ಷಾದ್ಧೃತದೀಕ್ಷಾ ||22||

ಕಾರಂಕಾರಮುಮೇ ಯದ್ ಬ್ರಹ್ಮಾಂಡಾನಿ ನಿಹಂಸಿ

ತನ್ಮನ್ಯೇ ಸುರಮಾನ್ಯೇ ಬಾಲೈವಾsಮ್ಬ ಸದಾ ತ್ವಂ ||23||

ಲೀಲೋಜ್ಜೀವಿತಕಾಮೇ ರಾಮೇ ಶಂಕರಸಕ್ತೇ

ತ್ವತ್ಪಾದಾರ್ಚನಸಕ್ತಂ ಭಕ್ತಂ ಮಾಂ ಕುರು ಶಕ್ತಂ ||24||

ಏತಾಃ ಪಾವನಗಂಧಾಃ ಸರ್ವೇಶಪ್ರಮದೇ ತೇ

ಹೈರಂಭ್ಯೋ ಮದಲೇಖಾಃ ಸಂತೋಷಾಯ ಭವಂತು ||25||     150

ಪುಷ್ಪಗುಚ್ಛ (ಸ್ತಬಕ) - 7

ಛಂದಸ್ಸು - ವಸಂತತಿಲಕಾವೃತ್ತಂ

ವ್ಯೋಮಶರೀರಾ, ಮಾತೃಕಾದಿವಿಭೂತಯಶ್ಚ

ವಾಣೀಸರೋರುಹದೃಶೋ ಹಯರಾಜಹಂಸೋ

ವಕ್ತ್ರಾರವಿಂದನಿಲಯಾದ್ಬಹಿರಾಗತಾಯಾಃ

ಆಲಾಪಕಾಲದರಹಾಸ ಇಹ ಸ್ಥಿತಾನಾಂ

ಕ್ಷೇಮಂ ಕರೋತು ಸುತರಾಂ ಹರಸುಂದರೀಯಃ ||1||

ನಾದೋsಸಿ ವಾಗಸಿ ವಿಭಾsಸಿ ಚಿದಸ್ಯಖಂಡಾ

ಖಂಡೀಭವಂತ್ಯಪಿ ಚಿದಸ್ಯಖಿಲೇಂದ್ರಕಾಂತೇ

ತತ್ತಾದೃಶೀಂ ನಿಖಿಲಶಕ್ತಿಸಮಷ್ಟಿಮೀಶೇ

ತ್ವಾಮಂತರಿಕ್ಷಪರಿಕ್ಲಪ್ತತನುಂ ನಮಾಮಿ ||2||

ವಿಶ್ವಪ್ರಸಿದ್ಧವಿಭವಾಸ್ತ್ರಿಷು ವಿಷ್ಟಪೇಷು

ಯಾಃ ಶಕ್ತಯಃ ಪ್ರವಿಲಸಂತಿ ಪರಃಸಹಸ್ರಾಃ

ತಾಸಾಂ ಸಮಷ್ಟಿರತಿಚಿತ್ರನಿಧಾನದೃಷ್ಟಿಃ

ಸೃಷ್ಟಿಸ್ಥಿತಿಪ್ರಲಯಕೃದ್ ಭುವನೇಶ್ವರಿ ತ್ವಂ ||3||

ಜಾನೇ ನ ಯತ್ತವ ಜಗಜ್ಜನಯಿತ್ರಿ ರೂಪಂ

ಸಂಕಲ್ಪ್ಯತೇ ಕಿಮಪಿ ತನ್ಮನಸೋ ಬಲೇನ

ಸಂಕಲ್ಪಿತಸ್ಯ ವಪುಷಃ ಶ್ರಿತಶೋಕಹಂತ್ರಿ

ವಿನ್ಯಸ್ಯತೇ ತವ ವಚೋತಿಗಧಾಮ ನಾಮ||4||

ಕಾಮಂ ವದಂತು ವನಿತಾಮಿತಿಹಾಸದಕ್ಷಾ-

ಸ್ತ್ವಾಂ ಸರ್ವಲೋಕಜನಯಿತ್ರಿ ಸದೇಹಬಂಧಾಂ

ಸತ್ಯಂ ಚ ತದ್ಭವತು ಸಾ ತವ ಕಾsಪಿ ಲೀಲಾ

ದಿವ್ಯಂ ರಜಸ್ತು ತವ ವಾಸ್ತವಿಕಂ ಶರೀರಂ ||5||

ಭೂಜನ್ಮಪಾಂಸುಭಿರಗರ್ಹಿತಶುದ್ಧರೂಪಾ

ಯಾ ಕಾsಪಿ ಪಾಂಸುಪಟಲೀ ವಿಪುಲೇsನ್ತರಿಕ್ಷೇ

ಸಾ ತೇ ತನುಃ ಸುಮಹತೀ ವರದೇ ಸುಸೂಕ್ಷ್ಮಾ

ತಾಮೇವ ದೇವಸರಣಿಂ ಕಥಯಂತಿ ಧೀರಾಃ ||6||

ಯಾ ದೇವೀ ದೇವಸರಣಿರ್ಭವಮಗ್ನದುರ್ಗಾ

ವೈರೋಚನೀತಿ ಕಥಿತಾ ತಪಸಾ ಜ್ವಲಂತೀ

ರಾಜೀವಬಂಧುಮಹಸಾ ವಿಹಿತಾಂಗರಾಗಾ

ಸಾ ತೇ ತನುರ್ಭವತಿ ಸರ್ವಸುಪರ್ವವರ್ಣ್ಯೇ ||7||

ಪ್ರಾಣಾಸ್ತವಾತ್ರ ಹೃದಯಂ ಚ ವಿರಾಜತೇsತ್ರ

ನೇತ್ರಾಣಿ ಚಾತ್ರ ಶತಶಃ ಶ್ರವಣಾನಿ ಚಾತ್ರ

ಘ್ರಾಣಾನಿ ಚಾತ್ರ ರಸನಾನಿ ತಥಾ ತ್ವಚಶ್ಚ

ವಾಚೋsತ್ರ ದೇವಿ ಚರಣಾನಿ ಚ ಪಾಣಯೋsತ್ರ ||8||

ಸರ್ವತ್ರ ಪಶ್ಯಸಿ ಶೃಣೋಷಿ ಚ ಸರ್ವತೋsಮ್ಬ

ಸರ್ವತ್ರ ಖಾದಸಿ ವಿಜಿಘ್ರಸಿ ಸರ್ವತೋsಪಿ

ಸರ್ವತ್ರ ಚ ಸ್ಪೃಶಸಿ ಮಾತರಭಿನ್ನಕಾಲೇ

ಕಃ ಶಕ್ನುಯಾನ್ನಿಗದಿತುಂ ತವ ದೇವಿ ಭಾಗ್ಯಂ||9||

ಸರ್ವತ್ರ ನಂದಸಿ ವಿಮುಂಚಸಿ ಸರ್ವತೋsಮ್ಬ

ಸರ್ವತ್ರ ಸಂಸರಸಿ ಗರ್ಜಸಿ ಸರ್ವತೋsಪಿ

ಸರ್ವತ್ರ ದೇವಿ ಕುರುಷೇ ತವ ಕರ್ಮಜಾಲ-

ವೈಚಿತ್ರ್ಯಮೀಶ್ವರಿ ನಿರೂಪಯಿತುಂ ಕ್ಷಮಃ ಕಃ ||10||

ವಿಶ್ವಾಂಬಿಕೇ ತ್ವಯಿ ರುಚಾಂ ಪತಯಃ ಕಿಯಂತೋ

ನಾನಾವಿದಾಬ್ಧಿಕಲಿತಾ ಕ್ಷಿತಯಃ ಕಿಯತ್ಯಃ

ಬಿಂಬಾನಿ ಶೀತಮಹಸಾಂ ಲಸತಾಂ ಕಿಯಂತಿ

ನೈತಶ್ಚ ವೇದ ಯದಿ ಕೋ ವಿಬುಧೋ ಬಹುಜ್ಞಃ ||11||

ಅವ್ಯಕ್ತಶಬ್ದಕಲಯಾsಖಿಲಮಂತರಿಕ್ಷಂ

ತ್ವಂ ವ್ಯಾಪ್ಯ ದೇವಿ ಸಕಲಾಗಮಸಂಪ್ರಗೀತೇ

ನಾದೋsಸ್ಯುಪಾಧಿವಶತೋsಥ ವಚಾಂಸಿ ಚಾಸಿ

ಬ್ರಾಹ್ಮೀಂ ವದಂತಿ ಕವಯೋsಮುಕವೈಭವಾಂ ತ್ವಾಂ ||12||

ನಾನಾವಿಧೈರ್ಭುವನಜಾಲಸವಿತ್ರಿ ರೂರ್ಪೈ-

ವ್ಯಾಪ್ತೈಕನಿಷ್ಕಲಗಭೀರಮಹಸ್ತರಂಗೈಃ

ವ್ಯಕ್ತಂ ವಿಚಿತ್ರಯಸಿ ಸರ್ವಮುಖರ್ವಶಕ್ತೇ

ಸಾ ವೈಷ್ಣವೀ ತವ ಕಲಾ ಕಥಿತಾ ಮುನೀಂದ್ರೈಃ ||13||

ವ್ಯಕ್ತಿತ್ವಮಂಬ ಹೃದಯೇ ಹೃದಯೇ ದಧಾಸಿ

ಯೇನ ಪ್ರಭಿನ್ನ ಇವ ಬದ್ಧ ಇವಾಂತರಾತ್ಮಾ

ಸೇಯಂ ಕಲಾ ಭುವನನಾಟಕಸೂತ್ರಭರ್ತ್ರಿ

ಮಾಹೇಶ್ವರೀತಿ ಕಥಿತಾ ತವ ಚಿದ್ವಿಭೂತಿಃ ||14||

ಆಹಾರಶುದ್ಧಿವಶತಃ ಪರಿಶುದ್ಧಸತ್ತ್ವೇ

ನಿತ್ಯಸ್ಥಿರಸ್ಮೃತಿಧರೇ ವಿಕಸತ್ಸರೋಜೇ

ಪ್ರಾದುರ್ಭವಸ್ಯಮಲತತ್ತ್ವವಿಭಾಸಿಕಾ ಯಾ

ಸಾ ತ್ವಂ ಸ್ಮೃತಾ ಗುರುಗುಹಸ್ಯ ಸವಿತ್ರಿ ಶಕ್ತಿಃ||15||

ಹವ್ಯಂ ಯಯಾ ದಿವಿಷದೋ ಮಧುರಂ ಲಭಂತೇ

ಕವ್ಯಂ ಯಯಾ ರುಚಿಕರಂ ಪಿತರೋ ಭಜಂತೇ

ಅಶ್ನಾತಿ ಚಾನ್ನಮಖಿಲೋsಪಿ ಜನೋ ಯಯೈವ

ಸಾ ತೇ ವರಾಹವದನೇತಿ ಕಲಾsಮ್ಬ ಗೀತಾ||16||

ದುಷ್ಟಾನ್ನಿಹಂಸಿ ಜಗತಾಮವನಾಯ ಸಾಕ್ಷಾ-

ದನ್ಯೈಶ್ಚ ಘಾತಯಸಿ ತಪ್ತಬಲೈರ್ಮಹದ್ಭಿಃ

ದಂಭೋಲಿಚೇಷ್ಟಿತಪರೀಕ್ಷ್ಯಬಲಾ ಬಲಾರೇಃ

ಶಕ್ತಿರ್ನ್ಯಗಾದಿ ತವ ದೇವಿ ವಿಭೂತಿರೇಷಾ ||17||

ಸಂಕಲ್ಪರಕ್ತಕಣಪಾನವಿಮೃದ್ಧಶಕ್ತ್ಯಾ

ಜಾಗ್ರತ್ಸಮಾಧಿಕಲಯೇಶ್ವರಿ ತೇ ವಿಭೂತ್ಯಾ

ಮೂಲಾಗ್ನಿಚಂಡಶಶಿಮುಂಡತನುತ್ರಭೇತ್ರ್ಯಾ

ಚಾಮುಂಡಯಾ ತನುಷು ದೇವಿ ನ ಕಿಂ ಕೃತಂ ಸ್ಯಾತ್ ||18||

ತ್ವಂ ಲೋಕರಾಜ್ಞಿ ಪರಮಾತ್ಮನಿ ಮೂಲಮಾಯಾ

ಶಕ್ರೇ ಸಮಸ್ತಸುರಭರ್ತರಿ ಜಾಲಮಾಯಾ

ಛಾಯೇಶ್ವರಾಂತರಪುಮಾತ್ಮನಿ ಯೋಗಮಾಯಾ

ಸಂಸಾರಸಕ್ತಹೃದಯೇಷ್ವಸಿ ಪಾಶಮಾಯಾ||19||

ತ್ವಂ ಭೂತಭರ್ತರಿ ಭವಸ್ಯನುಭೂತಿನಿದ್ರಾ

ಸೋಮಸ್ಯಪಾತರಿ ಬಿಡೌಜಸಿ ಮೋದನಿದ್ರಾ

ಸಪ್ತಾಶ್ವಬಿಂಬಪುರುಷಾತ್ಮನಿ ಯೋಗನಿದ್ರಾ

ಸಂಸಾರಮಗ್ನಹೃದಯೇಷ್ವಸಿ ಮೋಹನಿದ್ರಾ||20||

ವಿಷ್ಣುಶ್ಚಕಾರ ಮಧುಕೈಟಭನಾಶನಂ ಯನ್-

ಮುಕ್ತಃ ಸಹಸ್ರದಲಸಂಭವಸಂಸ್ತುತಾ ಸಾ

ಕಾಲೀ ಘನಾಂಜನನಿಭಪ್ರಭದೇಹಶಾಲಿ-

ನ್ಯುಗ್ರಾ ತವಾಂಬ ಭುವನೇಶ್ವರಿ ಕೋsಪಿ ಭಾಗಃ ||21||

ವಿದ್ಯುತ್ಪ್ರಭಾಮಯಮಧೃಷ್ಯತಮಂ ದ್ವಿಷದ್ಭಿ-

ಶ್ಚಂಡಪ್ರಚಂಡಮಖಿಲಕ್ಷತಕಾರ್ಯಶಕ್ತಂ

ಯತ್ತೇ ಸವಿತ್ರಿ ಮಹಿಷಸ್ಯ ವಧೇ ಸ್ವರೂಪಂ

ತಚ್ಚಿಂತನಾದಿಹ ನರಸ್ಯ ನ ಪಾಪಭೀತಿಃ ||22||

ಶುಂಭಂ ನಿಶುಂಭಮಪಿ ಯಾ ಜಗದೇಕವೀರೌ

ಶೂಲಾಗ್ರಶಾಂತಮಾಸೌ ಮಹತೀ ಚಕಾರ

ಸಾ ಕೌಶಿಕೀ ಭವತಿ ಕಾಶಯಶಾಃ ಕೃಶೋದ-

ರ್ಯಾತ್ಮಾಂಗಜಾ ತವ ಮಹೇಶ್ವರಿ ಕಶ್ಚಿದಂಶಃ ||23||

ಮಾಯೇ ಶಿವೇ ಶ್ರಿತವಿಪದ್ವಿನಿಹಂತ್ರಿ ಮಾತಃ

ಪಶ್ಯ ಪ್ರಸಾದಭರಶೀತಲಯಾ ದೃಶಾ ಮಾಂ

ಏಷೋಹಮಾತ್ಮಜಕಲತ್ರಸುಹೃತ್ಸಮೇತೋ

ದೇವಿ ತ್ವದೀಯಚರಣಂ ಶರಣಂ ಗತೋsಸ್ಮಿ ||24||

ಧಿನ್ವಂತು ಕೋಮಲಪದಾಃ ಶಿವವಲ್ಲಭಾಯಾ-

ಶ್ಚೇತೋ ವಸಂತತಿಲಕಾಃ ಕವಿಕುಂಜರಸ್ಯ

ಆನಂದಯಂತು ಚ ಪದಾಶ್ರಿತಸಾಧುಸಂಘಂ

ಕಷ್ಟಂ ವಿಧೂಯ ಸಕಲಂ ಚ ವಿಧಾಯ ಚೇಷ್ಟಂ ||25||     175

ಪುಷ್ಪಗುಚ್ಛ (ಸ್ತಬಕ) - 8

ಛಂದಸ್ಸು - ಅನುಷ್ಟುಬ್ದೃತ್ತಂ

ಚರಿತ್ರತ್ರಯಂ

ತಮಸಾಮಭಿತೋ ಹಂತಾ ಚನ್ಡಿಕಾಹಾದವಾಸರಃ

ಸತಾಂ ಹೃದಯರಾಜೀವವಿಕಾಸಾಯ ಪ್ರಕಲ್ಪತಾಂ ||1||

ಯಾ ನಿದ್ರಾ ಸರ್ವಭೂತಾನಾಂ ಯೋಗನಿದ್ರಾ ರಮಾಪತೇಃ

ಈಡ್ಯತಾಂ ಸಾ ಮಹಾಕಾಲೀ ಮಹಾಕಾಲಸಖೀ ಸಖೇ ||2||

ವಿರಿಂಚಿನಾ ಸ್ತುತೇ ಮಾತಃ ಕಾಲಿ ತ್ವಂ ಚೇನ್ನ ಮುಂಚಸಿ

ಮಧುಕೈಟಭಸಂಹಾರಂ ಕರೋತು ಕಥಮುಚ್ಯತಃ ||3||

ವಾಸವಃ ಕಾಶನೀಕಾಶಯಶೋಲಂಕೃತದಿಙುಖಃ

ಮಹೋಗ್ರವಿಕ್ರಮಾದ್ಯಸ್ಮಾದಾಸೀದಾಜೌ ಪರಾಙುಖಃ ||4||

ಯತ್ಪ್ರತಾಪೇನೆ ಸಂತಪ್ತೋ ಮನ್ಯೇ ಬಾಡಬರೂಪಭೃತ್

ಭಗವಾನನಲೋsದ್ಯಾಪಿ ಸಿಂಧುವಾಸಂ ನ ಮುಂಚತಿ ||5||

ಕುರ್ವಾಣೇ ಭೂತಕದನಂ ಯಸ್ಮಿನ್ವಿಸ್ಮಿತಚೇತಸಃ

ಏಷ ಏವಾಂತಕೋ ನಾಹಮಿತ್ಯಾಸೀದಂತಕಸ್ಯ ಧೀಃ ||6||

ರಣೇ ಯೇನಾತಿರಸ್ಕೃತ್ಯ ತ್ಯಕ್ತೋ ರಾಕ್ಷಸ ಇತ್ಯತಃ

ಚಿರಾಯ ಹರಿದಿಶೇಷು ಕೋಣೇಶಃ ಪ್ರಾಪ್ತವಾನ್ಯಶಃ ||7||

ಯನ್ನಿಯಂತುಮಶಕ್ತಸ್ಯ ಕುರ್ವಾಣಮಸತೀಃ ಕ್ರಿಯಾಃ

ನಿಯಂತುರಸತಾಮಾಸೀತ್ಪಾಶಿನೋ ಮಲಿನಂ ಯಶಃ ||8||

ಬಾಹುವೀರ್ಯಪರಾಭೂತೋ ಯಸ್ಯ ಪ್ರಾಯೇಣ ಮಾರುತಃ

ಬಭೂವ ಕ್ಷಣದಾಂತೇಷು ರತಾಂತಪರಿಚಾರಕಃ ||9||

ನಿಧಿನ್ಯೇನ ಜಿತೋ ಹಿತ್ವಾ ರಾಜರಾಜಃ ಪಲಾಯಿತಃ

ಸ್ಪಷ್ಟಂ ಬಭಾಣ ಮಾಧುರ್ಯಂ ಪ್ರಾಣಾನಾಮಖಿಲಾದಪಿ ||10||

ಯಸ್ಮಿನ್ನುತ್ತರಪೂರ್ವಸ್ಯಾ ದಿಶ ಏಕಾದಶಾಧಿಪಾಃ

ಕುಂಠಾ ಬಭೂವುರಾತ್ಮೀಯಕಂಠೋಪಮಿತಕೀರ್ತಯಃ ||11||

ನಿಜಶುದ್ಧಾಂತಕಾಂತಾನಾಮಾನನೈರೇವ ನಿರ್ಜಿತಂ

ಲಲಜ್ಜೇ ಯಃ ಪುನರ್ಜಿತ್ವಾ ಶೂರಮಾನಿ ಸುಧಾಕರಂ ||12||

ಬಾಲಸ್ಯೇವ ಕ್ರೀಡನಕೈಃ ಪ್ರವೀರೈರ್ಯಸ್ಯ ಖೇಲತಃ

ಲೀಲಾಕಂದುಕಧೀರಾಸೀದ್ದೇವೇ ದೀಧಿತಿಮಾಲಿನಿ ||13||

ತ್ರಿಯಾಮಾಚರಶುದ್ಧಾಂತಭ್ರೂವಿಲಾಸನಿವಾರಣಂ

ವಿಷ್ಣೋಃ ಸುದರ್ಶನಂ ಚಕ್ರಂ ಯಸ್ಯ ನಾಪಶ್ಯದಂತರಂ ||14||

ಮಹಿಷಂ ತಂ ಮಹಾವೀರ್ಯಂ ಯಾ ಸರ್ವಸುರದೇಹಜಾ

ಅವಧೀದ್ದಾನವಂ ತಸ್ಯೈ ಚಂಡಿಕಾಯೈ ನಮೋ ನಮಃ ||15||

ಮುಖಂ ತವಾಸೇಚನಕಂ ಧ್ಯಾಯಂ ಧ್ಯಾಯಂ ನಿರಂತರಂ

ಮೃಗೇಂದ್ರವಾಹೇ ಕಾಲೇನ ಮೃಡಸ್ತ್ವನ್ಮುಖತಾಂ ಗತಃ ||16||

ಕಾರ್ತಿಕೀಚಂದ್ರವದನಾ ಕಾಲಿಂದೀವೀಚಿದೋರ್ಲತಾ

ಅರುಣಾಂಭೋಜಚರಣಾ ಜಯತಿ ತ್ರಿರುಚಿಃ ಶಿವಾ ||17||

ಯತ್ತೇ ಕಚಭರಃ ಕಾಲೋ ಯದ್ಬಾಹುರ್ಲೋಕರಕ್ಷಕಃ

ಯುಕ್ತಂ ದ್ವಯಂ ಶಿವೇ ಮಧ್ಯಸ್ತ್ವಸನ್ನಾಕೋ ನ ನಾಕರಾಟ್ ||18||

ಸ್ವದೇಹಾದೇವ ಯಾ ದೇವೀ ಪ್ರದೀಪಾದಿವ ದೀಪಿಕಾ

ಆವಿರ್ಭಭೂವ ದೇವಾನಾಂ ಸ್ತುವತಾಂ ಹರ್ತುಮಾಪದಃ ||19||

ಧೈರ್ಯಚಾತುರ್ಯಗಾಂಭೀರ್ಯವೀರ್ಯಸೌಂದರ್ಯಶಾಲಿನೀಂ

ರತ್ನಂ ನಿತಂಬಿನೀಜಾತೌ ಮೇನಿರೇ ಯಾಂ ಸುರಾಸುರಾಃ ||20||

ಯದೀಯಹುಂಕೃತ್ಯನಲೇ ಧೂಮ್ರಾಕ್ಷೋsಭವದಾಹುತಿಃ

ಸಮಾಪ್ತಿಂ ಭೀಷಣಂ ಯಾವನ್ನೈವಾವಾಪ ವಿಕತ್ಥನಂ ||21||

ಚಾಮುಂಡಾಶಿವದೂತ್ಯೌ ಯತ್ ಕಲೇ ದಾರುಣವಿಕ್ರಮೇ

ಭಕ್ಷಯಾಮಾಸತುರ್ಮೂರ್ತೀಃ ಕೀರ್ತಿಭಿಃ ಸಹ ರಕ್ಷಸಾಂ ||22||

ಯಸ್ಯಾಃ ಶೂಲೇ ಜಗಾಮಾಸ್ತಂ ಯಶಃ ಶುಂಭನಿಶುಂಭಯೋಃ

ನಮಾಮಿ ವಿಮಲಶ್ಲೋಕಾಂ ಕೌಶಿಕೀಂ ನಾಮ ತಾಮುಮಾಂ ||23||

ಯಶೋದಾಗರ್ಭಜನನಾದ್ ಯಶೋದಾಂ ಗೋಕುಲಸ್ಯ ತಾಂ

ವಂದೇ ಭಗವತೀಂ ನಂದಾಂ ವಿಂಧ್ಯಾಚಲನಿವಾಸಿನೀಂ ||24||

ಅಂಬಿಕಾಮುಪತಿಷ್ಠಂತಾಮೇತಾಶ್ಚಂಡೀಮನುಷ್ಟುಭಃ

ಪ್ರಸನ್ನಾಃ ಸಾಧ್ವಲಂಕಾರಾಃ ಸಿದ್ಧಪದ್ಮೇಕ್ಷಣಾ ಇವ ||25||          200